د CSRS د علمي بورډ نوبتي ناسته ترسره شوه
د ستراتېژیکو او سیمه ییزو څېړنو مرکز د علمي بورډ نوبتي ناسته د روان کال سرطان میاشتې په ۲۴ نېټه دایره شوه.
غونډې ته لومړی د CSRS د تېرو درېیو میاشتو فعالیتونو راپور د امان الله کاکړ له خوا وړاندې شو چې د ارزولو وروسته وستایل شو او د بورډ غړو د فعالیتونو لا ښه والي په اړه یو لړ سپارښتنې هم ترسره کړې.
د غونډې په دویمه برخه کې د مرکز مطالعات راتلونکو نهو میاشتو کاري پلان د مرکز د رئیس لخوا وړاندې او تفصیلي بحث ورباندې ترسره شو او د تائید وړ وګرځېد.
د سپارښتنو په برخه کې د علمي بورډ غړي ډاکتر وحید الله مصلح د مرکز د آنلاینو سمینارونو ستاینه وکړه او هغه یې کامیابه او په وخت تجربه وګڼله. ښاغلي مصلح وویل، چې د کرونا وباء نه وروسته دې هم دا ډول برنامې جاري وساتلی شي.
د علمي بورډ بل غړي دوکتور عبدالصبور فخري صیب وویل چې د اسلامي ارزښتونو څخه د دفاع په برخه کې ترسره کېدونکو برنامو چاپي اړخ ته دې هم پاملرنه وشي.
استاد محمد زمان مزمل سپارښتنه وکړه چې د سولې په اړه دې مختلفې تحقیقي برنامې په لاره واچول شي او په میکانیزمونو دې کار وشي، ترڅو د سولې لپاره یو مسیر وټاکل شي.
د CSRS د علمي بورډ رئیس محترم دوکتور مصباح الله عبدالباقي بیا سپارښتنه وکړه دا چې د سولې په برخه کې یو لوری طالبان او بل افغان دولت دی نو د بین الافغاني خبرو اترو بحث غني کول پکار دي، ترڅو په ارزښتونو خبره وشي چې په بین الافغاني خبرو اترو کې کوم اړین موضوعات باید د بحث لاندې ونیول شي. او هېواد ته د سولې راوستلو په برخه کې اړوند لورو ته د اندېښنو کمولو او کامیابو خبرو اترو لپاره اړینې مشورې او وړاندیزونه وړاندې کړي.
په آخر کې د بورډ غړي او د پارلمان وکیل حمید الله حنیف د مرکز د مشرتابه څخه مننه وکړه چې په مناسب وخت کې یې د معارف په نصاب کې د دیني او وطني ارزښتونو څخه علمي دفاع وکړه. نوموړي زیاته کړه چې یاده موضوع په پارلمان کې تر بحث لاندې ده او ډېر ژر به مثبت نتائج ورباندې مرتب شي.